Kənd Təsərrüfatı Nazirliyi Baytarlıq Elmi-Tədqiqat İnstitutunun Balıq və arı xəstəlikləri şöbəsinin əməkdaşları tərəfindən 01.05 – 04.05.2023- cü il tarixlərində Şəki, Qəbələ, İsmayıllı rayonları üzrə DAİM-də “Arıçılığın müasir inkişafı istiqamətində yeni innovasiyaların tədbiqi” mövzusunda elmi-praktiki təlimlər keçirilmişdir.
Arıçılığın innovativ inkişafı, bal məhsuldarlığının artırılması yolları, yerli genefondun qorunması istiqamətində xüsusi hazırlanmış elmi-praktik proqram üzrə fermerləri narahat edən xəstəliklər və onlara qarşı aparılacaq yeni müalicə-profilaktika tədbirləri haqqında institutun mütəxəssisləri tərəfindən geniş müzakirələr aparılmışdır.
Təlimlərdən sonra arıçılıq təsərrüfatlarında arıxanalara kliniki baxış keçirilmişdir. Yaz mövsümündə arılara düzgün qulluq qaydalarına riayət olunması haqqında tövsiyələr verilmişdir. Arıçıları narahat edən arı xəstəliklərinin aradan qaldırılması istiqamətində yeni bitki mənşəli baytarlıq preparatlarının işlədilməsi qaydaları təklif olunmuşdur.
Arıçılıq təsərrüfatlarında geniş yayılmış xəstəliklərin qarşısını almaq və onlardan qorunmaq üçün mütəxəssislər tərəfindən hazırlanan təlimat, tövsiyə, bukletlər arıçılara paylanmışdır.
Təlimlər BETİ-nin Balıq və arı xəstəlikləri şöbəsinin müdiri, biologiya üzrə fəlsəfə doktoru, dosent Afət Süleymanova, Masallı Eksperimental Dayaq Məntəqəsinin müdiri Əbülfəz Şahmarov, böyük elmi işçi Firuzə Gülalıyeva və dəvət olunmuş alimlər Azərbaycan Pedoqoji Universitetinin “Biologiya və onun tədrisi metodikası” kafedrasının, biologiya elmləri doktoru, professor Rauf Sultanov, Naxçıvan Dövlət Universitetinın “Təbiətşunaslıq və Kənd Təsərrüfatı” kafedrasının biologiya üzrə fəlsəfə doktoru, dosent Mirmahmud Seyidli tərəfindən aparılmışdır.