Kənd Təsərrüfatı Nazirliyi  yanında Baytarlıq Elmi-Tədqiqat İnstitutu ilə Aqrar Xidmətlər Agentliyi arasında bağlanmış əməkdaşlıq müqaviləsinə əsasən Abşeron rayonun Yaşma  qəsəbəsində yerləşən kiçik fermer təsərrüfatının sahibkarı tərəfindən  Baytarlıq Elmi-Tədqiqat İnstitutuna qan-parazitar xəstəlikləri ilə  bağlı müraciət edilmişdir. Bu məqsədlə həmin təsərrüfatda iribuynuzlu heyvanlarda qan-parazitar xəstəliklərinə dair kliniki (hərarətin ölçülməsi) və parazitoloji (qan yaxmasının hazırlanması və xəstə heyvanlardan gənələrin toplanması) monitorinq keçirilmiş, 5 baş heyvanda yüksək hərarət (40,6-41,2) olduğu aşkarlanmışdır. Xəstə heyvanlarda kliniki əlamətləri nəzərə alaraq teylerioz diaqnozu qoyuldu. Qoyulmuş diaqnozu dəqiqləşdirmək üşün xəstə heyvanlardan müalicə aparmazdan əvvəl hazırlanmış periferik qan yaxmaları  və həmin heyvanlar üzərindən toplanmış gənələrin müayinə edilməsi üçün BETİ-nin Parazitologiya laboratoriyasına gətirildi. Laboratoriyada qan-parazitar xəstəliklərinin törədicilərini aşkar etmək məqsədilə  5 baş xəstə iribuynuzlu heyvanın  periferik qanından hazırlanmış yaxmalar  mikroskopik müayinədən keçirildi. Müayinə zamanı xəstə heyvanların qanında teyleriozun törədicisi  (Th.annulata)  aşkarlanmışdır.  İribuynuzlu xəstə heyvanlardan toplanmış gənələrin növü təyin olundu və həmin gənələrin Hyalomma plumbeum növü olması aşkar edildi.

          Qan-parazitar xəstəliyi aşkar edilmiş iribuynuzlu heyvanların müalicəsində 2 parazitotrop preparatın eyni vaxtda birgə işlədilməsinin müsbət nəticə verməsini nəzərə alaraq teyleryozun müalicəsində Bupartek+Minor birgə istifadəsi məqsədə uyğun hesab edilmişdir. Xəstə heyvanların müalicəsində hər iki preparat heyvanın 100 kq diri çəkisinə 5 ml boyun və yan hissədən əzələ daxilinə inyeksiya edilməsi, xəstəliyin gedişatı zamanı əmələ gələn toksinləri qandan təmizləmək üçün vena daxlinə 5%-li 200 ml qlükoza yeridilməsi, xəstə heyvanların qanında eritrositlərin fəaliyətini artırmaq məqsədi ilə Butacom-B₁₂ (vitamin mineral) 12 ml boyun əzələsinə inyeksiyası və xəstə heyvanlarda parazitlərin lokalizasiya etdikləri daxili orqanlarda ertrosidlərin parçalanması nəticəsində əmələ gələn iltihabların aradan qaldırılması üçün oksitetrasklin-1kq diri çəkiyə 2000-5000 vahid olmaqla əzələ daxilinə inyeksiyası  təsərrüfatın sahibkarına və yerli baytar həkiminə tövsiyyə edildi.