Baytarlıq Elmi-Tədqiqat İnstitutunun Parazitologiya şöbəsinin müdiri biol.ü.f.d., dosent Əzizova Aygün və şöbənin böyük elmi işçisi Məmmədova Gülər kənd təsərrüfatı heyvanlarında piroplazmidozlar (qan-parazitar xəstəlikləri), helmintozlar və ektoparazit gənələrlə yoluxmanın epizootik durumunu müəyyən etmək məqsədilə, Şəki-Zaqatala iqtisadi rayonuna ezamiyyə olunmuş, monitorinqlər keçirmişlər. Əməkdaşlar Şəki rayonunda yeləşən atçılıq kompleksində, Qax, Zaqatala, Balakən rayonlarının heyvandarlıq təsərrüfatlarında  olmuş, Qarabağ, Dilbaz, İngilis, Axaltəkə, Ərəb at cinslərinə kliniki baxış keçirmiş, parazitar xəstəlikləri müəyyən etmək üçün atlardan, iri vəxırdabuynuzlularda  patoloji materiallar götürmüşlər. Qızdırmalı və xəstəliyə şübhəli iri və xırdabuynuzlu heyvanların qulaq seyvanından piroplazmidozlara görə periferik qan yaxma nümunələri götürülmüş, heyvanların üzərindən törədici parazitləri keçirən gənələr toplanılmışdır. Piroplazmidoz törədicilərini keçirən iksodid gənələri ilə otlaqların yoluxma səviyyəsini və monieziyaların aralıq sahibləri olan oribatid gənələrin intensivliyini və növ tərkibini tədqiq etmək məqsədilə torpaq nümunələri götürülmüşdür. Patoloji materiallar və torpaq nümunələri “Parazitologiya” laboratoriyasında müayinədən keçirilmiş, törədici parazitlərin növ tərkibi təyin olunmuş, xəstəliklər müəyyən edilmişdir. Nəticələrə əsasən xəstəliklərə qarşı müalicə və profilaktika tədbirlərindən ibarət ekspertizalar hazırlanmış, “Heyvan Sağlamlığı və Baytarlıq Xitmətləri İdarə”lərinə və fermerlərə təqdim olunmuşdur.