Baytarlıq Elmi-Tədqiqat İnstitutunun Parazitologiya şöbəsinin müdiri Aygün Əzizova, şöbənin böyük elmi işçiləri Reyhan Məmmədova və Gülər Məmmədova Şəki və Qax rayonlarının heyvandarlıq və quşçuluq təsərrüfatlarında parazitar xəstəliklərə görə monitorinq keçirmişlər. Qan-parazitar xəstəliklərinə görə heyvanlara kliniki baxış zamanı qızdırmalı heyvan aşkar edilməsə də, heyvanların gənələrlə intensiv yoluxması qeyd edilmişdir.  Gənələr toplanılaraq onlarda olan xəstəlik törədicilərini müəyyən etmək üçün Parazitologiya şöbəsinin laboratoriyasına gətirilmişdir. Heyvanlarda və quşlarda helmintoz və ibtidai bağırsaq parazitlərinin törətdiyi xəstəlikləri aşkar etmək üçün koproloji nümunələr toplanılmışdır. Fermerlərə gənələrlə intensiv yoluxmuş iribuynuzluların akarisid preparatlarla çimizdirilməsi və qışa hazırlıq məqsədilə tövlələrin və quş damlarının dezinseksiya edilməsi tövsiyə olundu. Parazitologiya laboratoriyasında aparılmış müayinələrin nəticələrinə əsəsən heyvanlarda və quşlarda aşkar edilmiş helmintoz və protozoozlara qarşı anthelmint və antparazitar preparatların mərhələli müalicə sxemi təklif edildi.