Sentyabrın 15-dən Lənkəran Dövlət Universitetinin (LDU) “Baytarlıq” fakültəsinin “Baytarlıq təbabəti” ixtisası üzrə təhsil alan V kurs tələbələrinə Azərbaycan Respublikası Kənd Təsərrüfatı Nazirliyi Baytarlıq Elmi-Tədqiqat İnstitutunda kliniki - təcrübə dərsləri keçirlir.

İlkin təcrübəyə tələbələr institutun "Quş xəstəlikləri” şöbəsi laboratoriyasından başlayıblar. Baytarlıq Elmi-Tədqiqat İnstitutunun Quş xəstəlikləri şöbəsinin müdiri, kliniki-istehsalat təcrübəsinin rəhbəri, aqrar.e.ü.f.d. Mirzəmməd Həsənov tələbələrə innovativ texnologiyaların tətbiqi olaraq fitobiotik təsirli bitkilərin müxtəlif infeksion xəstəliklərinə qarşı müalicə-profilaktika üsulları, quşlarda kliniki müayinələr, patanatomik yarmanın aparılmasına dair elmi-praktiki təcrübə dərsləri keçir, praktik məşğələlər aparır.       

LDU-nun V kurs tələbələrinin  institutun Arı və balıq xəstəlikləri, Baytarlıq Klinikası və heyvanların infeksion xəstəlikləri, Yoluxmayan daxili xəstəliklər, Parazitologiya, Virusologiya və Baytarlıq preparatlarının istehsalının təşkili  və  tətbiqi şöbələrində 2025-2026-cı tədris planına uyğun olaraq kliniki-təcrübə dərslərinin keçirilməsi nəzərdə tutulur.

Qeyd edək ki, tədris planına əsasən 15 sentyabr tarixindən başlanan təcrübə 15 həftə davam etdiriləcəkdir.