8 Noyabr – Zəfər Günü münasibətilə Baytarlıq Elmi-Tədqiqat İnstitutunda “Zəfər Günü – xalqımızın qürur və şərəf səhifəsi” adlı tədbir təşkil olunub.

Tədbiri institutun direktoru, aqrar elmlər üzrə fəlsəfə doktoru, dosent Sialə Rüstəmova açaraq iştirakçıları salamlayıb və Vətən uğrunda canından keçən şəhidlərimizin xatirəsi bir dəqiqəlik sükutla yad edilib.

İnstitutun direktoru Sialə Rüstəmova qeyd edib ki, Zəfər Günü Azərbaycanın müasir tarixində xalqımızın birliyinin, milli həmrəyliyinin və Ordumuzun qəhrəmanlığının simvoludur. Bu qələbə Ulu Öndər Heydər Əliyevin siyasi xəttinin layiqli davamçısı, Müzəffər Ali Baş Komandan Prezident İlham Əliyevin qətiyyətli rəhbərliyi, Azərbaycan Ordusunun igidliyi və xalqın dəmir iradəsi sayəsində mümkün olub.
Direktor vurğulayıb ki, 44 günlük Vətən müharibəsi xalqımızın yenilməz ruhunu, Vətənə olan sonsuz sevgisini və dövlətinə sədaqətini bir daha sübut etdi.

Daha sonra İnstitut əməkdaşları Eldar Kosayev, Nahidə Rzayeva və Nurəddin Quliyev də çıxışlarında Zəfər Gününün xalqımız üçün mənəvi dəyərini, bu tarixi hadisənin gələcək nəsillərə vətənpərvərlik nümunəsi kimi çatdırılmasının vacibliyini vurğulayıblar.

Tədbirin sonunda Zəfər Gününə həsr olunmuş videoçarx nümayiş etdirilib. Videoçarxda 44 günlük müharibədə Azərbaycan Ordusunun şücaəti, xalqımızın birliyi və Müzəffər Ali Baş Komandanın rəhbərliyi ilə qazanılmış tarixi Qələbənin anları əks olunub.

Sonda Sialə xanım institutun yubilyar əməkdaşları İradə Şahbazovanı və Rüfət Əli-zadəni də yubileyləri münasibəti ilə təbrik edib.