2025-ci il 9-16 noyabr tarixlərində “Aqrar Xidmətlər Agentliyinin Struktur İslahatı və Strateji İnkişafına Dəstək” layihəsi çərçivəsində Türkiyə Respublikasına işgüzar səfər həyata keçirilmişdir.

Səfərin məqsədi yerli və qlobal strategiyalara əsaslanan yoluxucu heyvan xəstəliklərinin monitorinqi, erkən aşkarlanması və idarəetmə modellərinin öyrənilməsi, həmçinin iribuynuzlu və digər təsərrüfat heyvanlarında genişmiqyaslı xəstəliklərin qarşısının alınması istiqamətində milli vaksinasiya proqramlarının quruluşu, maliyyələşdirilməsi və icra mexanizmlərinin təhlili olmuşdur.

Bu məqsədlə nümayəndə heyəti Türkiyə Respublikasının Kənd Təsərrüfatı və Meşə Nazirliyinin Heyvandarlıq üzrə Baş İdarəsində görüşlər keçirmiş, heyvan sağlamlığının qorunması sahəsində Türkiyənin təcrübəsi ilə yaxından tanış olmuşdur.

Səfərdə Baytarlıq Elmi-Tədqiqat İnstitutunun direktoru Sialə Rüstəmova da iştirak etmişdir.

Görüşlər zamanı tərəflər epizootik vəziyyətin idarə olunması, yoluxucu xəstəliklərin profilaktikası, vaksinasiya proqramlarının səmərəliliyinin artırılması və elmi-tədqiqat əməkdaşlığının gücləndirilməsi istiqamətlərində fikir mübadiləsi aparmış, qarşılıqlı təcrübə mübadiləsinin vacibliyini vurğulamışlar.

Səfər çərçivəsində əldə olunan bilik və təcrübənin ölkəmizdə heyvan sağlamlığının qorunması, baytarlıq xidmətlərinin təkmilləşdirilməsi və beynəlxalq əməkdaşlığın genişləndirilməsi işinə mühüm töhfə verəcəyi gözlənilir.